Monday, February 28, 2011

الخطايا العشر التي قضت على مبارك


بقلم- خالد البرماوي:

كان نظام الرئيس السابق مبارك، كريما في أخطائه، سواء في عددها أو في ضخامتها، ويعود هذا لجرأته وغروره في ارتكابها، وظنه، أنه يحكم شعبًا من "الجثث"، التي لا تثور ولا تغضب.. وجاءت أخطاء مشهد ما قبل النهاية كمحفزات و"مغيظات" للناس كي تثور.. ابرزها بلطجته في إدارة انتخابات مجلس الشعب التي حصل فيها علي 95% بشفافية !! وسلق القوانين وتفصيلها، وغلو المعيشة  والبطالة المزمنة وجباية الضرائب دون فائدة، هذا غير الفساد المفضوح من سرقة ونهب أموال وارضي الدولة، الذي كانت تتم "عيني عينك. جهاراً نهاراً".

ورغم أن هذه الممارسات العنيفة "سياسيا"، كانت احد الاسباب الرئيسية لغضب الناس وخروجهم في 25 يناير، إلا ان اخطاء مشهد النهاية وحدها كانت كارثية، وعجّلت بنهاية النظام بشكل سريع، وهو ما نستطيع ان نقول عنه، بارتياح وشماتة كبيرة ، لا نخجل منها "على نفسها جنت براقش".. وإليكم عشرة اخطاء من وجهة نظري قضت علي نظام مبارك "بدري بدري.. في 18 يومًا فقط". 

1- غيبوبة البداية: عدم توقع حجم وطريقة وخريطة سير المظاهرات، فقبل يوم 25 يناير، كان الأمن يتعامل بشكل عادي مع هذا الحدث، ماعدا بعض التحركات الروتينية.. رغم انه، حسب علمي، عُقِد اجتماع "هاتفي" ضم وزير الداخلية السابق والرئيس السابق مبارك، وصفوت والشريف وزكريا عزمي وفتحي سرور، وحذّر فيه الأخير من خطورة هذه التظاهرات، التي كانت منتشرة في كل مكان على الانترنت،  إلا أن وزير الداخلية، قال لها بتناكته المعهودة – كما اتخيل- اطمئنوا كله تحت السيطرة.

2- ثورة مستوردة: مصر مستهدفة.. وقلة مندسة.. وأجندات خارجية، وخيم وأموال أمريكية في ميدان التحرير،  ثم دخلنا  في قصة وجبات كنتاكي ، وجواسيس اسرائيليين، وأيادي إيرانية تعبث !!، وتواجد ميداني قوي من حماس – اقسم بالله ان احد الوزراء قال انهم كانوا يرفعون اعلامهم في ميدان التحرير-.. وطبعا هذه الرسائل المُلفّقة والكاذبة، خرجت من النظام البائس الغبي من فعل الصدمة، مما يؤكد انهم كانوا مهزوزين ومرعوبين ع الاخر.. ويكفي أن صفوت الشريف صرح لبرنامج "الحياة والناس" يوم 26 يناير، بأن ايادي خفيّة تعبث بأمن واستقرار مصر.. وفي نفس الوقت وعلى نفس القناة، لبرنامج آخر هو "الحياة اليوم"، فتحي سرور صرح بأنها ثورة من الشباب لمطالب يمكن النظر في تحقيقها.


3- الاستخفاف بالشباب: وصل بهم الحد الي التجريح في الشباب وتجاهل أي حديث عن الشهداء، بل ان الصحف القومية اعتبرتهم "قتلي" وليسوا شهداء، 
 وهذه  كانت سمة رئيسية لتعامل النظام في كل مراحل الثورة.. هذا الاستهانة بالشباب وبأدواتهم البسيطة، من الانترنت والشبكات الاجتماعية والهواتف المحمولة وقدرتهم على التنظيم، جعلت النظام لا يعطي الشباب قدرهم، وبالتالي؛ لم يستطع أن يتعامل معه بالكفاءة واليقظة المطلوبة.. لهذا كانت المفاجأة ضخمة والتراجع سريعًا ومريعاً.. لأنهم ببساطة اعتمدوا على ادوات سياسية بالية ليست في قواميس الشباب، مثل "الرئيس الرمز والأب"، والفراغ الدستوري، والقمع الأمني، ثم الانفلات الامني، ثم الخسائر الاقتصادية، بينما الشباب كان يتعامل مع الامور باعتبارها، قضية حرية وديمقراطية وكرامة وعدالة انسانية.. والنظام كان يراها قضية أمنية بحتة وليست سياسية او حتى حقوقية .


4- خطابات الرئيس: نستطيع أن نقول عنها بأريحية شديدة إنها كانت مملة.. ورسائلها متأخرة دائماً، و"يطق من جنباتها" العند والتعالي والغرور، حتى القرارات التي كانت تأتي بها، دائماً ما تكون متأخرة بخطوة عن مطالب الثوار.. ولو عُدنا إلى يوم 25 يناير، كان يكفي قرار - وليس خطاب - بإقالة الحكومة لتهدئي من المتظاهرين .. ولكن مؤسسة الرئاسة، كانت تعاند بصلف شديد، وترفض ان تكون في موقع رد الفعل، فاستمرت في عنادها؛ واستمرت الثورة حتى كتب لها الله  ان تنجح، لأن الله أرادَ أن يعمي النظام السابق، عن أي قرارات سليمة تصدر في وقتها، وتمتص غضب الشعب، وكلنا يعرف مدى عاطفة الشعب المصري؛ ولكن الله ستر..

5- التغطية الإعلامية الرسمية: بإجماع  منقطع النظير كانت ضعيفة، ومضللة ومفبركة، وغير مهنية اطلاقة، استخدمت أبواق تقليدية لا تحظي بأي مصداقية، وهذه الأخطاء الفادحة جعلت النظام يخسر وسائل إعلامه الرسمية، ومن الجولة الأولى؛ حتى عندما حاول أن يستخدم بعض القنوات الخاصة كان الوقت قد فات لكي تقوم بدور مؤثر، لأنها هي الأخرى كانت متحفظة وسلبية للغاية، خاصة في الأيام الأولى للثورة.. لهذا كان اتجاه الناس، ومنذ البداية، نحو قنوات العربية والجزيرة، كخيار أول.. بغض النظر عن مضمون الرسالة التي كانت تُبث على هاتين القناتين.. ورغم تغطيتهم المتميزة، الا انها كان بها ببعض التجاوزات المهنية.

6- الإعلام الأجنبي: مع بداية الثورة، بدأ يتوافد على مصر بكثرة، خاصة في محافظات القاهرة، والاسكندرية والسويس، مئات المراسلين الأجانب من كل دول العالم، جاءوا لتغطية الحدث التاريخي.. والثورة الاولي في التاريخ التي تشاهد وقاعها "بث حي" على الهواء، وبدل من ان يكون النظام السابق بتسهيل الأمور لهم والسعي لكسب ودهم، لكن غبائهم هداهم الي ملاحقة وضرب وحبس المراسلين الاجانب، مما جعله يخسر أي لمحة تعاطف أو نظرة موضوعية كان يمكن أن يحصل عليها، بسبب تعامله القاسي مع الإعلام الأجنبي، فكانت النتيجة ان صورته كان وحشية وسيئة جدًا في كل وسائل الاعلام العالمية.

7- موقعة الجمل: لو كان لنا ان نختار أكبر خطأ وقع فيه النظام، ستحتل موقعة "الجمل والبغال والحمير"، دون منازع المرتبة الأولى، فقبل هذه الكارثة بليلة واحدة، جاء خطاب مبارك الذي أعلن عن نيته في عدم الترشح مجددًا، وقال إنه "وُلِد وحارب وعاش وسيموت على أرض مصر"، فما كان إلا أن دمعت أعين الكثير من المصريين.. وأخذ مؤشر التعاطف معه في الصعود بقوة.. وكان يمكن - لو هناك أذكياء حول مبارك - ان يتم البناء على هذه النقطة، ولربما أنقذ نظام  مبارك نفسه من الغرق، ولكن موقعة الجمل، جاءت كطوق نجاة للثورة، وحماه من فخ التعاطف الأعمى، الذي ربما كانت سيقضى على الثورة عند هذه المرحلة.

8- قطع الانترنت والمحمول: كعادة الأجهزة الأمنية، لا تفكر أبعد من موضع قدميها، اذا رأتهما أصلاً، وكرد فعل لقطع لخدمات الانترنت وشبكات الهاتف المحمول مساء يوم 27 يناير، تحركت الناس بالملايين، لجمعة الغضب، غيظًا من هذا العقاب الجماعي، فمن كان سينتظر لكي يعرف ماذا سيحدث من خلال الانترنت، او للتنسيق مع أحد بالهاتف، فضّل عن أن يتابع بشكل مباشر ما يحدث في الميدان، ليشارك في الحدث بنفسه، فازدادت اعداد المشاركين بصورة خرافية وغير متوقعة، وفي كل مكان في مصر، وكانت بمثابة الضربة القاسمة، والنهاية الحقيقة للنظام !!

9- الانفلات الأمني: سواء تم بقصد أو بغير قصد؛ فقد أفاد الثورة كثيرًا، لأن ذلك الموقف اثبت للعالم أجمع، ان المصريين شعب عظيم متحضر، وقف يحمي المنازل والشوارع والمنشآت الحكومية، وأيضًا الكنائس، التي لم تشهد حادثة هجوم واحدة رغم الغياب التام للشرطة. وفي ميدان التحرير، ورغم عدم وجود أي فرد أمن هناك،  آلا ان المشهد كان رائعا وخالدا، الملايين يتوافدون علي الميدان كل يوم، يقومون بتنظيم الدخول والتفتيش، ثم التنظيف، دون تحرش او سرقة او تعصب او عصبية.. في مشهد لن ينساه العالم ابداً.

10- التفاوض مع المجهول: احد ابرز الاخطاء الاستراتيجية التي وقع فيها النظام، ولو كان باتزانه ما كان بدء في خلع ثيابه، واحد تلو الاخر، دون أن يعرف لمن يخلع، او إلى أي مرحلة سيتوقف عن الخلع؛ ولكن لأن الصدمة كانت قوية، والغضب كان يأتي من كل مكان، فاضطر النظام، أن يحاول ان يسترضي الجميع، وعندما بدت عليه ملامح الانهيار الكبير.. ارتفع سقف المطالب، ولم يقبل الناس الا برأس النظام نفسه.. فمن ذا الذي يجد أمامه فرصة للخلاص والحرية ولا يتمسك بها؟!

رسالة الى حزب الكنبة العظيم



بصرف النظر عن أنني لا أتفق معه علي بعض النقاط إلا أني رأيتها مفيده لتوضيح الأمور
--------------------------------------------------------------------------------------------------------------------

حزب الكنبة هو حزب يضم فى عضويته كل من كان يشاهد ثورة شعب مصر فى 25 يناير من خلال كنبة بيته ولم يقم الا لعمل كوب من الشاى . 
  
وحزب الكنبة يضم مؤيدين ومعارضين للثورة ويسألون اسئلة وساحاول ان ارد عليهم بدون الدخول فى فذلكة سياسية 
  
السؤال الأول: مين شباب 25 يناير؟ 
  
الاجابة: مافيش وصف محدد للشاب ال 25 يناير...لو قصدكم على ممثلين الثورة..فامافيش برضه ممثل معين..ودة لان الثورة دى جديدة علينا ,,لأننا متعودين ان 
الثورة شخص...هوجة عرابى..سعد زغلول..جمال عبد الناصر ومحمد نجيب..اما الائتلافات ومجلس الثورة فهى مكونة من نشطاء وحركات سياسية لضمان نتائج الثورة 
مثل الجمعية الوطنية للتغيير وشباب 6 ابريل والاخوان المسلمين وحركات تانية سياسية وحقوقية مثل كفاية 
  
السؤال الثانى: امال مين وائل غنيم؟ 
  
وائل غنيم شاب مصرى يعمل بشركة جوجل الامريكية ومن مؤسسى جروب كلنا خالد سعيد...وهذا الجروب قام بمشاركة حركات سياسية كبيرة فى الاعداد للثورة وهذا الجروب 
والمشتركين فيه ساهموا فى قلب قضية خالد سعيد لقضية رأى عام واعادة تشريح جثته والعمل على دفع الشباب للخروج الى الشارع فى وقفات احتجاجية صامتة على كورنيش 
الاسكندرية وكورنيش النيل بمصر وهذا الجروب هو من اختار يوم 25 يناير وجمعة الغضب 
  
السؤال الثالث: بس وائل غنيم طلع ماسونى 
  
حتى لو طلع ابو لهب انت فارقة معاك فى ايه؟ ركز معايا وائل ماقالش انه بطل ولا عايز يبقى جيفارا..وتشويهه دى خطة الحزب الواطى من زمان..يخلى الثورة شخص 
وبعدين يشوهه..زى ما حصل لنعمان جمعة رئيس حزب الوفد السابق وايمن نور من حزب الغد والبرادعى..نفس الاسلوب البيئة بتاع الحزب الواطى..ومش عارف انتوا يا حزب الكنبة ليه بتقعوا فى نفس الخطأ..وبعدين انت عارف يعنى ايه ماسونى اصلا؟


السؤال الرابع: بس هو فعلا مزقوق من الامريكان علشان طنط جارتنا ابنها ملازم فى المرورعارف كل حاجة طب وائل غنيم جاسوس..تحب نرجع مبارك؟ 
  
السؤال الخامس: طب هو مبارك مش راح شرم..هم عايزين ايه تانى؟ 
  
اولا مين هم؟ لو انت مش شايف انك جزء منهم..خليك سلبى وماتعترضش عليهم..اشمعنى يعنى كنت سلبى ومبارك بيورث ابنه مصر ومسلمها لاحمد عز؟..اعتبرهم زى 
مبارك يا اخى..ولا علشان هم ماعاندهمش امن الدولة تعترض عليهم ومبارك كنت عامل نفسك مش واخد بالك..طب ايه رأيك بقى ..دول اللى شالوا مبارك..تانى حاجة 
حسنين هيكل التعلب السياسى بنفسه طلع على القناة المصرية اللى تحت سيطرة الجيش وقال مبارك يحكم مصر من شرم..ولا انت بتفهم اكتر من حسنين هيكل وشباب الثورة 
والجيش اللى سامح بكل دة يتقال..اعمل لك كوباية شاى تانية وركز. 
  
السؤال السادس: انا زهقت ما تخليهم يبطلوا يروحو الميدان..مش طالبة زحمة 
  
اكيد لما مبارك وامن الدولة والداخلية ما يقدروش عليهم هم مش هسمعوا كلامك ولا كلامى ولا كلام اى حد الا ما تتحقق مطالبهم...وميدان التحرير اكتسب شهرة عالمية وكل الدنيا مبهورة بينا...انت كدة  كأنك بتطلب من الصين تشيل السور العظيم بتاعها علشان سادد عليهم منظر البحر..وبعدين زهقت من ايه؟ دى ثورة مش كرنفال الكربة ولملم 
  
السؤال السابع: بس عيب اللى عملوه فى مبارك ..ده كبيرنا. 
  
ممكن اعتبرة كبيرنا لو كنا عصابة...يعنى مش محتاج اوريلك كم الفساد والنهب ويكفى ان محمد حسنين هيكل قال على القناة المصرية اللى هى تبع الجيش ان موضوع الضربة 
الجوية دة كلام مضحك وانه ازاح ابطال اكتوبر كما تزيح المرأة الغيورة ضراتها..وانه كان بياخد 800 900 مليون جنيه من مخصصات قناة السويس لنفسه...تانى حاجة 
تقدمه فى السن لن تعفيه من المسائلة ولا المحاكمة...ومش من المنطقى رجل استهزأ بشعبه وقال على المعارضة خليهم يتسلوا ونطلع نلطم ونقول له خد الدوا يا ريس ولا لما يلاقى حزبه لاهف كل مقاعد البرلمان ويشكر عز على الهواء على نزاهة الانتخابات ..واقول معلش اصل سنه كبير 
  
السؤال الثامن: بس مش هو اللى بيعمل كدة..دة ابنه واللى حواليه 
  
وهو صغير مش واخد باله ان الوزرا دخلوا الحزب ورشحوا نفسهم فى مجلس الشعب وبيسرقوا؟..اذا كنت انا عارف وانت عارف..هو مش هيعرف؟ 
  
السؤال التاسع: طب ايه موضوع حكومة تكنوقراط دى؟ 
  
تكنوقراط يعنى ناس محترمة ليها خبرة فى مجالها ولا تنتمى لحزب ومحبوبة بين الناس..كأنك مسكت احمد زويل التعليم 
  
السؤال العاشر: الاخوان الاخوان..يا خرابى..القرضاوى جيه ..احييه احييه 
  
انشف ناشف كدة وماتقعدتش تلطم زى اسرائيل وبطاقتك فى ايدك انزل وانتخب 
  
السؤال الحادى عشر: طب انتخب مين؟ 
  
الثورة قامت علشان ماحدش يبقى وصى على حد ويقول لك انتخب مين..اتعب شوية واقرا البرامج الانتخابية وانت على الكنبة 
  
السؤال الثانى عشر: يعنى عاجبك اللى حصل فى مصر دة؟ 
  
لو قصدك على التلاتين سنة بتوع حكم مبارك اكيد مش عاجبنى..لو قصدك على الحرق وتهريب المساجين برضه مش المتظاهرين..مين اللى طلعهم..انا مش النيابة ولو ردك ان المباحث هى اللى طلعتهم يبقى انت رديت على نفسك خلاص وعرفت مين اللى كان خارب البلد 
  
السؤال الثالث عشر: طب والمطالب الفئوية 
  
واضح انك ناسى الاعتصامات اللى كانت قدام مجلس الشعب..المطالب دى من زمان وهى شغالة وماحدش عبرهم..ابتدوا من قبل الثورة وانضموا للثورة ولسة مكملين 
  
السؤال الرابع عشر: بس دى هتخرب البلد 
  
اللى خرب البلد جهاز امن الدولة اللى كان معين ناس فى نقابات العمال وكل النقابات وماكانتش بتجيب للناس حقوقها 
  
السؤال الخامس عشر: ايه الثورة المضادة؟ 
  
الثورة المضادة انك تلاقى حسام البدراوى عضو الوطنى السابق بيعمل حزب اسمه 25 يناير..وانك تلاقى اشاعات عمالة تطلع من رجالة صفوت الشريف لافقادك الثقة فى الثورة والشباب اللى عملوها فتختار واحد كنت تعرفه من النظام القديم..الثورة المضادة انك تلاقى رجالة امن الدولة بتولع بين الناس وتبعت الرجالة والبلطجية تسرق وتقتل وتقومك على الداخلية فى نفس علشان الثورة ما تنجحش وتتمنى عودة حد من النظام القديم على اساس انه فاهم فى البلد 
  
السؤال السادس عشر: يعنى بعد الثورة كيس المكرونة هيبقى بكام؟ 
  
يا ريت نبص لابعد من كيس المكرونة والفرخة..25 يناير المطالب كانت عيش..حرية..عدالة اجتماعية..لو حاسس ان الكلام دة ميأكلش عيش..هاقولهالك بالطريقة اللى 
انت تفهمها..لما مديرك ما يدفعش رشوة علشان المسئول الفاسد هرب بعد الثورة او اتقبض عليه..الفلوس الزيادة اللى مع مديرك دة مفروض يشبرئك بيها او يكبر البيزنس 
فتكبر انت معاه او يرخص الاسعار علشان المنافسة فكيس المكرونة بتاعك هيرخص 
  
السؤال السابع عشر: يا عم امريكا واسرائيل وايران هتحتلنا بسبب الثورة 
  
اسرائيل بعد اول يوم من الثورة وهى عاملة زى النسوان وعمالة تلطم..على الغاز ومعاهدة السلام وبان قد ايه هو ضعفاء..وبعد الضغط الشعبى الغاز انقطع عنهم.زولما فتحوا بقهم زيادة الجيش سمح بعبور سفينيتين ايرانيتين فاتلموا خالص وابتدوا يدوروا على غاز عندهم..وبالراحة كدة مع بعضينا..بن اليعازر مدير الموساد السابق قال على مبارك كنز استراتيجى لاسرائيل..ليه؟علشان مبارك كان بيغذى فينا فكرة الرعب من اسرائيل بقالوا تلاتين سنة..دة غير انه كان بيديهم 40 % من الغاز الطبيعى بتاعهم. بتلت الاسعار العالمية..وبعد ما قفلنا الحنفية..عملوا ايه؟ ولا حاجة..وامريكا تحتلنا ليه..طب والكونجرس واعداء اوباما السياسيين هيسيبوه مثلا ومايستغلوش الظروف..انشفوا بقى وشوفوا الدنيا بتقول علينا ايه منهم اوباما نفسه اللى عايز يحتلنا..اما عن ايران..فهى اصلا مش عدو وعندها ثورة..ومن الاخر لا ينصح باحتلال دولة قامت فيها ثورة وتعداد سكانها تمانين مليون 
  
السؤال الثامن عشر..ايه العلمانية ولعياذ بالله 
  
العلمانية مش معناها الكفر والالحاد..فصل الدين عن الدولة تشريف للدين والمثال واضح وقريب..لما شيخ الازهر اتدخل فى السياسة وفتى بعدم جواز صلاة الجمعة وقت الفتن لاجهاض جمعة الغضب والبابا شنودة لما قال ولادنا مايتظاهروش ودة كان تأييد منهم لمبارك..ايه اللى حصل؟ ماحدش سمع كلامهم ....وبقى ايه منظر الازهر وكنيسة الاسكندرية؟ مش كان احسن مايتكلموش ومايتدخلوش فى السياسة؟..شفت لما السياسة بتدخل فى الدين ايه اللة بيحصل؟..شفت ايران مثلا لما رجال الدين ايدوا الثورة المصرية وبعدين قتلوا المتظاهرين المؤيدين لنفس الثورة؟


ومشكلة العلمانية انها كلمة بقت سيئة السمعة من تأثير النظام 
  
السؤال التاسع عشر: طب انا ليه حاسس بالقلق 
  
منطقى جداً...دى اول ثورة تشوفها...والوضع جديد ولازم تقلق ولازم تتفائل..اسرائيل فقدت حليفها الاول والشعب فاق..وانت لازم تبتسم وتشكر الشباب اللى ماتوا 
علشان انت تخلص من عصابة مبارك 
  
السؤال العشرين: طب انا مين وتبع ايه ونزلت المظاهرات ولا لأ واخدت لك كام رصاصة؟ 
  
انا اسمى عزت امين ونزلت او مانزلتش دة بالتعبير السياسى "شأن داخلى" وكل ثورة وانتم طيبين

Saturday, February 26, 2011

إبراهيم فايق: الاختلافات العشرة بين مبارك والقذافي!!


أول سؤال ستطرحه بالتأكيد لماذا عشرة اختلافات تحديدا.. لماذا لا تكون 11 أو 12 أو حتى 20، الحقيقة لا أعرف، وجدتها هكذا، وهكذا نتحدث عن الاختلافات بين الثنائي محمد حسني مبارك ومعمر القذافي.

الاختلاف الأول: مبارك منع الفيس بوك ثم أوقف عمل الإنترنت وخدمات التليفون المحمول، أما القذافي فقال: لست ديكتاتورا لكي أمنع
 الفيس بوك لكني سأعتقل من يستخدمه!!

الاختلاف الثاني: مبارك استخدم تعبير الأجندة كدافع للثوار الخائنين، لكنه لم يقل لنا ماذا يفضل في كتابة ذكرياته.. مسطر 80 ولا كراسة صفحة وصفحة؟؟،  أما القذافي فاستخدم تعبير الحبوب المهلوسة كدافع للفئة من الثوار المعارضين.. لكنه لم يقل النوعية التي يفضل حتى يستخدمها مناصريه!!

الاختلاف الثالث: مبارك أرهب شعبه بالإخوان المسلمين وأخبرهم أن الفيشة بقت في الكوبس ولو مشي هتحصل قافله، والقذافي أرهب ناسه بالمصريين والتوانسة وأخبرهم أنهم يريدون -التخميس- معهم في البترول وثروات البلاد.

الاختلاف الرابع: كلاهما تأخر للخروج والحديث مع شعبه، لكن يحسب لمبارك أنه.. لم يركب توك توك.. لم يستخدم شمسية.. لم يتحدث من شارع.. لم يعتمر قبعة كاريكاتيرية.. هذا يحسب للرئيس المصري السابق.. إنما يحسب للقذافي أنه أدخل للمرة الأولى الفقرة الكوميدية على خطابات الرؤوساء.. انجاز تاريخي حقا!!

الاختلاف الخامس: قدم مبارك لشعبه وللعالم 3 خطابات، الأول لم يكن مفيدا والثاني كان لئيما والثالث كان متأخرا جدا.. لاحظ لدينا توصيفا ما للأمر، القذافي قدم خطابات ومداخلات عبر الهاتف لا تعد ولا تحصى، المحصلة النهائية.. في كل مرة تبحث مع الأصدقاء عن شريط الترجمة

الاختلاف السادس: مبارك راوغ وحاول بكل الطرق ألا يستقيل من منصبه أو يتنحى لأنه يعرف جيدا أنه رئيس، القذافي يعلم أنه ليس رئيسا ولا يسير بالدستور ولا يعترف بالديموقراطية ولا يتحدث عن التنحي ولا يعرف سوى الزحف.. "إنتي جايه هنا اتشغلي إيه؟؟"

الاختلاف السابع: مع مبارك -أثناء الثورة- أنت تدرك أن هناك تضييقا ما على وسائل الإعلام العالمية لكنك كنت ترى دائما صورا على الهواء مباشرة نقلتها كاميرات محترفة، في ليبيا ومع القذافي أنت لا تشاهد سوى لقطات بلوتوثية التقطتها أجهزة الموبايل.

الاختلاف الثامن: مع كل يوم اشتدت فيه الثورة في مصر قدم مبارك تنازلا متأخرا بعض الشيء، لكنه على الأقل قدم شيئا لشعبه، حتى ولو على سبيل التمثيل المشرف، بينما لم يقدم القذافي.. ولم يؤخر.

الاختلاف التاسع: مبارك قال في بداية الثورة: "مصر ليست تونس".. والقذافي قال: "ليبيا ليست مصر ولا تونس".. معلومة مؤكدة من كتب التاريخ هذه ثلاث دول عربية مختلفة!!

الاختلاف العاشر: مبارك ترك السلطة بعدما أصبح خيار التنحي هو الخيار الأخير، بالنسبة للقذافي خيار التنحي هو خيار مخلل لن يلجأ إليه إلا وقت الغداء.

أما الاتفاق الوحيد أن كلاهما قتل شعبه ولكن بطرق مختلفة، مبارك استخدم الداخلية والبلطجية لإسقاط 500 شهيد، والقذافي استخدم الجيش والمرتزقة والطائرات والقاذفات لقتل عدد لن يحصى بكل تأكيد من أبناء وطنه.

Friday, February 25, 2011

شكرا يا مبارك


الدعوة للاستمرار والانتصار

احنا نازلين عشان نقول ان الثورة ما خلصتش لحد ما نحقق كل المطالب، وعشان نحتفل كمان

سمعت عن موضوع جمعة العرفان دي

عرفان وتوديع لمبارك، عشان يقولوا له شكرا

انا كمان عايزة اشكر مبارك

شكرا يا مبارك على انك خدمت البلد تلاتين سنة

شكرا لأنك دمرت الصناعة المصرية وفككت القطاع العام وبعته للمستثمرين وخربت بيوت العمال 

شكرا انك حولت المواطن المصري من مزارع وصانع لسواق توك توك

شكرا على تجريف الاراضي 

شكرا على ان السفارة المصري في اي حتة في العالم هي بالنسبة لاي مصري مهاجر او مقيم في الخارج بوابة جهنم لحد ما بقى كل الناس تستهين بينا وتسترخصنا

شكرا على انك كسرت نفس الصعايدة وقعدت عشر سنين تطحن في كرامتهم لما خليتهم مش حاسين ان البلد بلدهم وبقوا حاسين ان اهالي بحري دول قوات احتلال

شكرا على انك حاربت الارهاب.. امال، انا فاكرة كويس قوي حربك على الارهاب، لما كنت بتقتل شباب زي الورد في الشارع وياخدوا بصمات الجثث ويبتدوا التحقيق..... مع الجثث

شكرا على انك عشان تحارب الارهاب خلقت تجار مخدرات وبلطجية في الصعيد كانوا بيكسروا نفس الناس وينيموهم من المغرب

شكرا انك عشان تقسم الصعيد على نفسه خلقت فتنة طائفية وكرهت المسلمين والمسيحيين في بعض

(في بداية الحرب على الارهاب في الصعيد، الجماعات الاسلامية كانوا بيروحوا يستخبوا في بيوت المسيحيين عشان بيتناصحوا يعني على الامن، والمسيحيين زي اي صعايدة، اللي يستغيث بيهم لازم ينجدوه، فلما عرف عمل كام حاجة تقوم المسيحيين على المسلمين وتخوفهم، ومن ضمنها مثلا ان المسئول عن مذبحة الكشح ما يتحاسبش، والله اعلم بقى مين اللي عملها، اكيد هم مدام هم اللي فجروا القديسين، ومدام اللي عملها ما اتمسكش، واجبر بعض المسيحيين انهم يشتغلوا مع الامن، وخلا الامن يسرب خبر ان مسيحيين بيشتغلوا مع الامن للمسلمين وشعللها وخلاهم مش طايقين بعض، مع انه كان داخل عليهم وهم سمنة على عسل حتى مع وجود الجماعات الاسلامية)

شكرا انك بعد ما كسرت نفس الصعيد عشان تخلص على الجماعات الاسلامية قلت ان الايد البطالة نجسة ودرت على بقية مصر تكسر نفسها

شكرا على انك قعدت قوات الامن في الصعيد كل السنين دي وما فكرتش ولا ثانية ان الصعايدة لابسين الجلاليب على اللحم وانهم بياكلوا طاقة واحدة في اليوم وان فيه ايام بتعدي عليهم من غير اكل.. ما كانش يهمك، كان يهمك تكسر نفسهم وتهينهم وتخليهم يا اما يشتغلوا مع الامن يا اما يبقوا تحت رحمة تجار المخدرات والبلطجية

شكرا انك عممت التعذيب في كل قسم وفي كل مديرية امن لحد ما ظابط الشرطة المصري اقتنع تماما ان شغلته الاساسية انه يعذب الناس 

شكرا على سكان العشوائيات اللي بياكلوا من الزبالة وفضلت تكبر وتوسع فيهم واي حد يحاول يساعدهم تطفشه لانك محتاجهم في الانتخابات تشتري اصواتهم بوجبة وبطانية وشيرز 

شكرا على جوع الناس وانت عمال تكوم في سبعين مليار دولار

شكرا على انك اشتغلت خدام للامريكا وقضيت تلاتين سنة تخدم المصالح الامريكية زي ما هيلاري بتقول وتذلنا احنا

شكرا على انك فضحتنا وخليت اللي يسوى واللي ما يسواش يقول لنا يا عملاء امريكا يا عملاء اسرائيل

شكرا على اننا بنشحت القمح

شكرا على تقسيم السودان

شكرا على فضيحتنا ايام حرب غزة وبقى العالم كله بيعمل مظاهرات قدام سفارتنا زي ما بيعملوا مظاهرات قدام سفارات اسرائيل وبقت راسنا احنا البلد اللي عمرها سبعتلاف سنة واتبنت على اكتاف الفلاحين والبنائين تتساوى براس خرية عمرها ستين سنة اللي اسسها مجموعة عصابات وخارجين عن القانون

شكرا على اننا ذالين نفسنا ومصالحين اسرائيل وانت بتبعت عيالنا يموتوا في كل حتة، وتبعت عيالنا يموتوا في حرب العراق وايران وخناقة مالناش لا في تورها ولا طحينها وبعدين ترجع تبعتهم تاني يموتوا لما صدام احتل الكويت.. يوه، ينيلك يا راجل، مش انت اللي قعدت تدعم في صدام طول السنين دي؟ وتبعت العيال لافغانستان عشان تخلص منهم ولما يرجعوا تحكم عليهم بالاعدام، وتبعت بنفسك العيال للبوسنة ولما يرجعوا تعدمهم برضه، انت ما عندكش غيرنا تبعته يموت؟ واللي يرجع ما يموتش تموته بنفسك؟

ولما ما لقتش حتة تموتنا تاني فيها بقيت تبعتنا في عبارات .. اه، عبارة من اللي بيغرقوا دول

شكرا على ان اول تصريح لك عن العبارة اتريقت عليها

شكرا على انك سبت الف مصري يموتوا ما بعتش لهم توك توك وانت بتبعت طيارة انقاذ لحرائق اسرائيل

وتركب ابنك علينا ويدلدل رجليه ويجيب صحابه يتسلوا علينا ويقلبونا في الفلوس

وتعمل لنا فتنة طائفية وكل ما تحتاس تدبح لك جوز عتاقي مسيحيين وتلبس المسلمين والمسيحيين في بعض عشان تخلص منا كأن وجودنا في الحياة هو مشكلتك الوحيدة 

وتموت لنا الناس وهم خارجين في عيدهم وتدخل اللي قتلهم مجلس الشعب 

وتموت لنا الناس في ليلة راس السنة وتلبسها لبريء يموت من التعذيب 

وتدي امر بنفسك لقوات الامن انهم يفتحوا علينا الرصاص الحي

شكرا شكرا شكرا ... مش عارفة اودي العرفان والوفاء فين ولا فين

شكرا على فتح الرصاص الحي على عمال المحلة عشان عايزين عيش حاف يأكلوا بيه ولادهم وتعمل لنا علاوة الصبح وتضاعف سعر البنزين بعد الضهر

شكرا على الشاب اللي مات جنبي على كوبري قصر النيل ومنظر الدم على جسمه ووشه مش عايز يفارق عينيا 

شكرا على انك تدي القوات المسلحة امر انهم يضربوا علينا رصاص حي ولولا انهم بني ادمين ومصريين كان زمانها بقت مدبحة وكان زمان البلد راحت في داهية ومش بعيد كان جالنا احتلال عشان انت ماسك في الكرسي ومش بعيد كان الجيش ضرب في بعضه... وانت يهمك ايه؟ 

ما نولع احنا وجيشنا وناسنا واهلنا وبلدنا المهم انت وفلوسنا اللي هربتها واللي طول فترة الثورة كنت بتعمل اتصالاتك عشان تأمنها

شكرا على انك كنت بتسيبنا مذلولين مستنيين خطابك وانت قاعد على التليفون مع بن اليعازر تشكي له همك 

شكرا 

شكرا

شكرا ايها الرئيس المخلوع محمد حسني مبارك

السادة اللي عاملين الايفينت ده على الفيس بوك.. اقولكم ايه؟ اقولكم ربنا يحرق قلوبكم زي ما اهالي الشهدا اتحرقت قلوبهم عشان تحسوا بغيركم؟

صورة مبارك اتشالت، واتحط مكانها لوحة عليها لفظ الجلالة

ومش حينفع لفظ الجلالة يتشال عشان يتحط مكانه اي حد تاني

لا غالب الا الله

اما العبيد.. فخليهم في اغلالهم

Monday, February 21, 2011

How to recover a browser-stored password in 4 clicks

So you have a little naughty password hidden behind your browser's asterisks, and for some reason you couldn't recover it. I'm going to show you how to recuperate that in less than 5 clicks, using Google Chrome/Chromium browser. Note that this can also be done using Firefox, via Firebug extension.



First,  right click on the password, and choose "Inspect Element". A menu will pop up as shown below (click the picture to enlarge):


Double click on the word "password" and change it to text. Hit Enter and the password will be shown.


Simple isn't it? If you find problems recovering hidden passwords in other browsers, you can  post  a comment below and I'll tell you how. Enjoy :) 

Friday, February 18, 2011

سيناريو الثورة المضادة !


فى كل الثورات المنتصرة .. هناك ما يسمى بالثورة المضادة .. و يقوم و يخطط لها عدد من اتباع الحاكم المستبد المخلوع و المستفيدين منه و أعوانه 
و أحيانا قد تنتهز الفرصة و تنجح مثلما حدث فى حالة الثورة الفرنسية فى احدى مراحلها .. و مثلما حدث فى الثورة المضادة على ثورة مصدق فى ايران عام 1951 و التى نجحت الى حد اعادة شاه ايران مرة أخرى وقتها بالشكل الذي جعل الشاه وقتها يقول ل" كيرميت روزفلت " ( ممثل المخابرات الامريكية ) :" إنني مدين بعرشي الى الله ثم الى شعبي ثم اليك " و كان صائبا فى الجزء الأخير فقط !
هذه الثورة المضادة كان لها محاولات ايضا فى تاريخ مصر , و كلنا نعرف ما حدث ايام العدوان الثلاثي على مصر ( 1956 ) عندما اجتمع عدد من الباشوات ( من أتباع النظام الملكي البائد ) ليحاولوا الاتصال بالسفارة البريطانية - اثناء الحرب و يعرضوا أنفسهم للحكم كبديل عن عهد عبد الناصر و ووصلت الاتصالات الى حد بدء الباشوات فى تشكيل حكومة من شدة ثقتهم فى انتصار بريطانيا و فرنسا و اسرائيل و سحقهم للقوات المصرية و المقاومة الشعبية فى بورسعيد , لكن ذلك لم يحدث و انقلب السحر على الساحر 
و حتى فى حالة ثورة تونس .. شاهدنا كلنا اتباع نظام بن على و هم يشيعون الفوضى بعد هروبه فى الايام التى تلت السقوط لمدة شهر قبل ان تتكشف الحقيقة و يتضح ان بعض قيادات الحرس الرئاسي هم المسئولون عن هذا 
و فى حالة ثورتنا هنا ... من يخطط لهذه الثورة المضادة .. ليس بالضرورة لعودة مبارك .. بل فقط لإستمرار نظام مبارك بشكل آخر اكثر تطورا او عودة بشكل جديد او ومختلف 
و بالطبع لا حاجة للقول هنا السيناريو القادم ليس من قبيل التخيل المطلق ( و ستجدون بانفسكم ان الأمر اكثر تعقيدا من خيال اي شخص او قدرته على الاختلاق , مهما كان عبقريا ) 
بل هو اجزاء و شواهد وردت الينا مؤكدة من عدة مصادر حتى تكشفت لدينا الصورة كاملة بعد بحث مضني فى المؤشرات لنتأكد مما ورد الينا 
و لا استطيع الجزم بوجوده 100 % .. و لكنني شخصيا متيقن انه حقيقي .. و لكن وجدت ان افضل ما نفعله للتأكد هو أن نقوم بعرضه عليكم 
نعم .. سأعرض السيناريو تفصيليا و بعدها يكون الحكم لكم :
اذا كان هذا ممكن ؟ أو هذا صحيح ؟
هل هذا متوقع ؟ 

الصورة الكاملة :
بعد نجاح الثورة و بدء حصارها لعدد من رموز و قيادات النظام و بقاء جزء منهم ينتظر المحاسبة قرر عدد منهم أن يبادر بالهجوم اتباعا لمبدأ " الهجوم خير وسيلة للدفاع " 
و اجتمعت الضباع الجريحة على عدة طوائف متفرقة يجمعهم انهم من رجال النظام المطلوب انهاؤه :

ضباط فى جهاز امن دولة تحركهم روح الانتقام و الخوف من المحاسبة على عهود تعذيب 
رجال مخابرات يدينون بالولاء لعمر سليمان 
رجال اعمال فاسدين معرضون للمطاردة و المحاسبة و المحاكمة 
قيادات كبرى و صغرى فى الحزب الوطني وجدوا أنه يصعب عليهم التلون فى ظل النظام الجديد و فى ظل جيل من الثوار لديه انترنت يوثق كل ما جرى و كل كلمة قالوها سابقا 
و قيادات اعلامية ( بعضها ما زال موجودا ) ينتظر اقالة بين ليلة و اخرى 
بعض المسئولين الحاليين فى الحكومة و فى مواقع حيوية ( منهم وزراء ما زالوا فى مواقعهم فى الحكومة الحالية و ينتظرون اقالتهم )
و بعد اجتماعهم , تقررت الخطة لتحقيق عدة أهداف متفاوتة المدى :
الدفاع عن صورتهم بشكل عام و ازالة اتهاماتهم اعلاميا 
شغل الرأي العام و الثوار و الجيش عن محاسبتهم عن جرائمهم طوال سنوات فى حق الشعب المصري 
الايقاع بين قيادات القوات المسلحة و بين الثوار و افساد الروح الايجابية بينهم 
اشاعة الفوضى بشكل عام بهدف اظهار الحالة 
و ربما اذا نجح المخطط الى نهايته قد ينتهى بعودة النظام الحالى و ليس بالضرورة مبارك 
.. 
بل قد يكون عمر سليمان أو حتى اي وجه جديد يضمن حماية اتباع النظام من المسائلة مستقبلا 
و لتحقيق هذه الأهداف 
بدأوا التحرك على سبعة محاور محددة و بعناية و خبرة تجمع بين خبرات سابقة كبيرة فى مجال الحشد و خبرات أخرى أمنية و استخباراتية فى مجال الحرب النفسية و فى فنون الدعاية السوداء و غيرها 
هذه المحاور هي :

|| 1 || 
المحور الأول : عفا الله عما سلف !
ستجد كثيرا جدا من الدعوات تملأ عدد من الصحف و الفيس بوك تحمل هذا المفهوم 
بحجة .. عفا الله عما سلف .. لا داعي للمحاسبة .. دعونا نبدأ صفحة جديدة .. فلننس الاحقاد 
.. 
لتكن ثورة بيضاء للنهاية .. لنلتفت للمستقبل و لا نشغل انفسنا بالماضي 
و هذه اول خطوة فى توجيه الرأي العام بعيدا عن فكرة محاسبتهم 
و فى الأصل : لا تناقض ابدا بين الاعداد للمستقبل و المرحلة الانتقالية و الديمقراطية , 
و بين محاسبة رؤوس الفساد و الاجرام بشكل عادل و كامل !

.. 
و هو ما يوضح لك هذه الفكرة من ينشرونها و لمصلحة من ؟
و بالطبع ليس كل من يتحدث عن هذه الفكرة هو يعمل فى اطار هذا المخطط و انما قد يكون مقتنع بها أو تأثر بها اعلاميا بحسن نية و شعبنا شعب طيب و متسامح 


|| 2 || 
المحور الثاني : زيادة عدد الاعتصامات الفئوية مع شيء من الفوضى 
و يحدث هذا بالطبع مع توصيل الصورة إلى قيادات القوات المسلحة عن هذه الاعتصامات انها ( كلها ) بتحريك من الثوار ! و ليست احتجاجا على فساد او طلب لازاحتهم مثلا من مواقعهم !
و هو ما سيجعل - طبعا - القوات المسلحة تتصل تلقائيا بالثوار لتطلب منهم تهدئة وتيرة الاعتصامات .. و طبعا لن تصدق اصلا ان الثوار غير مسئولين عنها نهائيا او أنها بأى إيعاز منهم على الاطلاق .. و هو ما يجعل القيادة العسكرية تبدأ فى الضيق و نفاذ الصبر مما يفعله الثوار 
و نستطيع هنا أن اؤكد بشكل جازم هنا ان اكثر من 60 % من الاعتصامات هي بإيعاز من هذا المخطط و ليس احتجاجات طبيعية و بعضها حتى مستفز جدا 
و حتى نكون محددين , ستجد لها عدة سمات :
تتسم ببعض الهمجية و الفوضى و بشكل غير سلمى التى تتناقض مع اخلاقيات الثورة فى ميدان التحرير الحضارية التى شهدناها جميعا و العالم كله 
ستكون اعتصامات سقف مطالبها مرتفع جدا جدا بشكل تعجيزي فى بعض الاحيان , و فى الاغلب تكون مالية فقط و لا تحوى اي طلبات تغيير فاسدين 

تعطل مصالح المواطنين بشكل متعمد و مضر جدا و أناني جدا بما يثير الرأي العام ضدها و ضد الثورة عموما 

و احيانا تتسم ببعض العنف بخلاف كونها سلمية من حيث تكسير مكان او رمي بعض الحجارة بشكل غريب و عجيب !
و الهدف هنا بالطبع ان تصبح الصورة فى النهاية ان الثورة دمرت الاقتصاد و دمرت مصر 
و انها اشاعت الفوضى 
و ان نظام مبارك كان اكثر استقرار من هذا !
و من يدرى قد تجد فى هذا المجال من يظهر و يترحم بشكل مصطنع على مبارك و ايامه هنا !

|| 3 || 
المحور الثالث : اثارة التعاطف حول مبارك 
ويظهر ذلك فى عدد من الاخبار الغريبة التى يقوم ببثها فى بعض وسائل الاعلام مصادر "تدعى " قربها من الصورة فى منفى مبارك فى شرم الشيخ , من أخبار متتابعة 
فتجد .. خبرا يتحدث عن غيبوبة لمبارك 
.. 
و خبر يتحدث عن انه رفض مغادرة شرم الشيخ الى غيرها من البلاد " لأن هذه بلده و سيموت فيها "
و خبر آخير تجده عن انه سيؤدي العمرة و انه يوصى بدفنه فى قرب حفيده !
و حتى اخبار عن مشاجرات بين جمال و علاء ابني مبارك و ان حالته النفسية سيئة 
و خبر آخر عن مجموعة تعلن تعاطفها مع مبارك تحت شعار " إحنا اسفين يا ريس "
مجموعة اخبار تلو اخبار 
.. 
لا تعلم مصدرها و تظهر أخبار اخرى تؤكد كذبها بعدها !
فخبر الغيبوبة ياضح أنه فى اليوم الثاني المصادر الموثوقة اعلاميا تؤكد انه غير صحيح !
و خبر الحالة النفسية السيئة او الصحة المتدهورة جدا تنفيه اخبار وسائل اعلام و صحف عالمية تؤكد انه فى شرم الشيخ و يتناول الكافيار الروسي و الشيكولاتة السويسري بل و يتابع التقارير التى ما زال يرسلها له يوميا عمر سليمان و زكريا عزمي الذين ما زالا فى موقعيهما بروتوكوليا و صلاحيات عمل حتى هذه اللحظة !
و الأهم ما أكدته صحف موثوق فيها من انه يمارس حياته كأنه ( رئيس ) فى بعض الجوانب من حيث اطلاعه على تقارير سياسية عما يدور !!!!

|| 4 || 
المحور الرابع : تشويه صورة الثوار 
و كمثال يظهر ذلك فى حملات التشويه التى ستجدونها تشوه الناشط السياسي وائل غنيم 
فتارة ستجد فيديو يصفه بالماسونية و العمالة للخارج ! .. و تارة ستجد فيديو يصفه بالعمالة لأمن الدولة !
و المضحك انك ستلاحظ هنا سمات مميزة تشم فيها رائحة الوطني بإمتياز :
السمة الأولى : انهما تهمتان متناقضتان من ذات المصدر 
.. 
يعنى الا يذكرك هذا بمن كان يتهم الثوار بتبعيتهم لحماس و ايران و امريكا و اسرائيل ايضا !!! 
.. 
تهمتان متناقضتان طبعا لأن الهدف واضح : تشويه فقط و ليس حوار منطقي !

السمة الثانية : انها غبية بفجاجة !
يعنى عندما تجد واحد يقرر ان هذا ماسوني بناءا على تشابه فى حظاظة ( قد تكون موضة ) او بادج تي شيرت عادي .. فهذا تخلف و غباء يذكرنا ايضا بما رأيناه من التهمة اياها " بأنهم يأكلون وجبات كنتاكي " ايام الثورة , بينما كانت محلات الكنتاكي فى كل مصر مغلقة منذ يوم 26 يناير حفاظا على نفسها من التكسير اصلا !!! 
الغباء واحد للأسف ايها السادة 

|| 5 || 
المحور الخامس : ازالة اتهاماتهم اعلاميا 
يظهر هذا فى ظهور عدد من رموز النظام و العاملين فيه مثل أحمد عز عبر قناة اخبارية ( العربية ) يعلم انها ستكون حنونة عليه فى الاسئلة بدون تعمق و انما بنظام سؤال و جواب و يظهر هذا فى مظاهرات الباشوات للشرطة تطالب بزيادة الرواتب .. و الظهور فى مظهر المطحونين و المظلومين !!!! 
و الكل يعلم ان الرشاوي كانت عادة لديهم كنزوا من ورائها الكثير 
و المفارقة ان بعضهم كان يتظاهر مرتديا نظارات شمسية فاخرة او يضع سماعة بلوتوث تليفونه المحمول فى أذنه!!!!
و الأنكى و الاعجب هو اصرارهم على اعتبار " كل من سقطوا منهم " شهداء بقرار رسمي ضغطوا لصدوره !!!
و اذا كنت اعتبر كل العزل الذين سقطوا ضربا بالرصاص من الداخلية هم شهداء 
فكيف اساوى بينهم و بين من قد يكون ربما سقط انتقاما من قتله لعشرات الشهداء او دهسهم مثلا ؟ دون تحقيق يوضح و يبين الحقيقة ؟
لكن هدف التظاهر هو ازالة اتهاماتهم اعلاميا و منع محاسبتهم 
يضاف الى هذا انك لم تسمع من الوزير الحالى عن اي اخبار عن حل جهاز أمن الدولة ( اذا كانت النوايا حسنة ) 
او حتى اخبار عن اننا بدانا فى عزل او فرز الضباط ممن لديهم سجل اجرامي واضح و جرائم و شكاوى سابقة فى حقهم فى التعذيب و غيره ؟؟؟


|| 6 || 
المحور السادس : افساد العلاقة بين القوات المسلحة و بين الثوار 
و ذلك عن طريق خلق استفزازات متبادلة بين القوات المسلحة و بين الثوار , 
هذا المحور قد تجده فى تشويه صورة القوات المسلحة و خلق استفزاز عن طريق تأخير الافراج عن المعتقلين السياسيين 
بواسطة رجال النظام الذين ما زالوا باقين فى امن الدولة مثلا ) و عن طريق الايقاع من الحكومة و رجالها عندما يقوموا مثلا بإلقاء مسئولية اعباء المعتصمين - بشكل متعمد - منها على اكتاف الجيش المثقلة بالاعباء اصلا 
هذا المحور قد تجده في نقطة الاعتصامات المتزايدة بشكل زائد عن الحد بشكل واضح جدا و غريب 
و هذا المحور قد تجده مثلا فى صفحة فيس بوك كتبنا عنها .. صفحة ( الراجل اللي ورا عمر سليمان ) و التى يتضح فى النهاية انها اساءة لرجل مقدم اركان حرب من رجال الجيش المصري ! 
و ربما كانت هذه الصفحة فعلا دعابة بحسن نية فيمن كانوا وراء الصفحة و لكنها مثال على ما قد يمكن عمله مستقبلا فى هذا المحور ) 


|| 7 || 
المحور السابع : العودة للحكم عبر عباءة جديدة !
و هذا المحور طبعا قد ينجح فعلا و بدأوا يمهدوا له من خلال دعوة د. حسام بدراوي لتشكيل حزب جديد بإسم " حزب 25 يناير " !!!
و دعونا نتخيل هنا لو لم يكن قيادي فى الوطني وراء هذا الحزب و انما ينشئه عدد من المجهولين و يكون فى خلف الستار مجموعة اتباع النظام المخلوع يمولونه و يدعمونه بهدف الدفع من هذا الحزب الى سباق الانتخابات بوجه جديد قد يصعد الى الحكم و يحميهم من المحاسبة على الأقل 
و بصفة عامة لا تثق هنا فى تلك الفترة - مهما كانت النوايا حسنة - فى اي حركة او ايا من يحمل لافتة 25 يناير 
او الثورة الا ان يكون ينطوي على ثلاث سمات :
السمة الأولى ان يكون به احدى القوى الاساسية التى قدحت شرارة الثورة ( شباب 6 ابريل - أدمين خالد سعيد - شباب حملة البرادعي ) 
السمة الثانية ان يكون يأتى اما باختيار شعبي او باختيار اعضاء بناءا على اسس واضحة 
و ستلاحظ فى هذا الاطار تعليقات موجهة من اشخاص ( مجهولين ) لاتعرفهم يتحدثون عن ان الثورة ليست حكرا على ( من نزلوا الميدان أو من ثاروا او من دعموا الثورة ) 
و ان النظام القادم ( يجب ) ان يشمل الكفاءات ايضا !!!!!
و ستلاحظ ايضا انقلابا ناعما فى تعليقات من كانوا ينشرون شتائم ضد الثوار و الآن يعلنون انهم " ايدوها من اول يوم" ! 
هذه المحاور و كلها ستجدها بدأ التنفيذ فيها فى الفعل و البعض ينفذ هذه المحاور بحسن نية دون ان يدرى 

سواء اعلاميا 
أمس كانت هناك حلقة من برنامج العاشرة مساءا عن الشرطة و اهمية تبرئة ساحتها و عفا الله عما سلف !
والغريب ان الضيوف من الشرطة كانوا ثلاثة ( اثنان من ضباط الشرطة و الثالث نائب مدير امن دولة سابق ! ) 
فى حين ان الضيف الذي يطالب بالمحاسبة بقوة و المحاكمة كان محامي فقط ) 
او على الانترنت .. فى فيديوهات لها اسماء على غرار ( الحقيقة وراء فلان ) ( كشف المخطط المستخدم من فلان او صفحة كذا ) 
او فى عدد من التعليقات لا تعرف مصدرها 
اذن هذه هي محاور الخطة 

|| 1 || 
المحور الأول : اسقاط الحساب عفا الله عما سلف !
|| 2 || 
المحور الثاني : زيادة عدد الاعتصامات الفئوية مع شيء من الفوضى 
|| 3 || 
المحور الثالث : اثارة التعاطف حول مبارك 
|| 4 || 
المحور الرابع : تشويه صورة الثوار 
|| 5 || 
المحور الخامس : ازالة اتهاماتهم اعلاميا 
|| 6 || 
المحور السادس : افساد العلاقة بين القوات المسلحة و بين الثوار 
|| 7 || 
المحور السابع : العودة للحكم عبر عباءة جديدة !
ضع هذه المحاور فقط فى بالك فى الايام القادمة و تابع التعليقات على الانترنت او الاعلام و قل لي كم محور وجدته منفذا بالفعل ؟
اذا وجدتها السبعة .. فمعنى هذا ان المخطط صحيح بالفعل 
لأنه تأكد من هذه القاعدة : لا يوجد ما يسمى بالصدفة أبدا فى عالم السياسة 
كما قلت و أكرر 
سأعرض عليكم تفصيليا و بعدها يكون الحكم لكم :
اذا كان هذا ممكن ؟ أو هذا صحيح ؟ هل هذا متوقع ؟ 
و الأهم هل سينجح ؟
هناك حديث شريف يؤكد ما معناه انه سيأتى زمان قد يكذب فيه الناس احيانا .. من هو صادق
و يصدق فيه الناس .. من هو كاذب 
و البرت اينشتين قال :
الشيء الوحيد الضروري لانتصار الشر فى العالم , 
هو فقط : ألا يفعل الأخيار اي شيء !
لهذا اذا اقتنعت و تأكدت - مثلى - بصدقية المخطط القذر هذا فتحرك للقيام بدورك , ليس فقط بنشر المقال فقط , بل أيضا الوقوف ضد من تشعر انهم ينفذون هذا المخطط فى كل مكان , بالفكرة و بالحجة و بالنقاش 
نعم , أتمنى أن تكون أنت من سيحدد هنا عزيزي القاريء 
.. 
لأنه انت من سيحمى الثورة 
.. 
و لا تنتظر أحدا غيرك يفعل هذا لأنك انت الثورة و انت من قمت بها , و انت من سيحميها و يدعمها 
تحياتي