تأثرا بالاعلان الدستوري الذي أعلنه المجلس الأعلى للقوات المسلحة والذي يحدد الشروط الدستورية التي يجب أن تنطبق على مرشحي الرئاسة في الإنتخابات القادمة، انطلق نشطاء موقع تويتر هم الآخرون في إعلان شروطهم التي يريدون أن تتوفر في الرئيس الجديد المنتظر.
كما أن معظم الذين شاركوا في وضع تلك الشروط هم من أبناء العصر المباركي المخلوع، وهو ما يبرر وجود الكثير الشروط التي تريد ابعاد أي كلمة أو وصف أو تعليق أو حركة أو ايماءه كان يصدرها الرئيس المخلوع!
- غير منوفي ومن أبوين غير منوفيين ولم يسبق له الحصول علي الجنسيه المنوفيانيه ولااتجوز مونوفييايه
- كل يوم الصبح يسمع أغنية دامت لمين.
- ما يعملش زيارات مفاجئة للمصانع يوم السبت الساعة حداشر، احنا اللي حنعمل له زيارات مفاجئة كل تلات ساعات
- مايفتكرش انه عشان بقى رئيس انه قائد الثورة
- مايقولناش الإخوة و الأخوات.. أمي ما خلفتش غيري انا واخواتي
- الي يقول كلمة بناء علي تعليمات السيد الرئيس يعدمه مباشرة من غير محاكمة
- يكون بيتكلم و يفهم إنجليزى من غير ما يطرطق ودانه
- ولو نجح بنسبة اكتر من 60% في الانتخابات يتحاكم
- يبقى عارف اننا منتخبينه هوه مش هوه ومراته و ابنه واخواته وامه وعيلته كلها
- يبقى عنده فيسبوك و تويتر بس معندوش فارم فيل ..ويكتب تويت واحده ف اليوم عشان ميضيعش وقت الشعب
- ميكونش ف لمعان و بريق حمادة هلال
- يكون متواضع جدا ...اه طبعا .....لا مش لدرجة يقعد في خيمه دي تبقي فال شؤم
- مراته لازم تاخد لقب سيدة مصر الأخيرة
- مايقعدش فى القصر الجمهورى ياخد شقة ايجار جديد احسن
- لازم كل جمعة بعد الصلاة يزور منطقة ويتكلم مع اهلها
- ياكل العيش أبو شلن ويشرب من الحنفية
- ماتكونش البدله بتاعتو مكتوب عليها اسمه.. عايزينه يجيب بدل من عند ابو نسمه
- المفروض يقعد يفر كل حاجة في البلد ، يا راجل كبر مخك.
- لازم يبقي عنده ريسيفر وتيلفزيون وبيتفرج علي قناة الجزيرة
- بيقول الكيان دوله الإحتلال مش دوله إسرائيل
- مايكونش عمل أي ضربات جوية أو أرضية أو فضائية يذلنا بيها
- مش كل ما نكلمه يقولنا عيب انا زي ابوكم ولو حبكت يعنى وعاوز مشاعر أسريه عائلية .. ممكن يعتبر نفسه أختنا الصغيرة
- ميعطلش المرور عشان يروح مشوار يمشي في الشارع زيه زينا ياما يستخدم الطياره
- لا يبدأ اي جملة بكلمة "سنظل"
- ما يقولش على منتخبنا كويس ومايتصلش بحسن شحاته ولا يزور اللاعبين في التمرين.
- لازم مايكونش راعى الرياضة والرياضيين ولا راعى الثقافة والمثقفين ولا راعى الفن والفنانين.
- ميضحكش علينا ويروح يفتتح نفس الحاجه عشرين مرة.
- ميكونش بيصلي العيد قبل العيد ما يبدأ و تلاقي صورته ملطوعه عالاهرام يوم الوقفه الساعه اتناشر بليل.
- يبطل كلمة نشجب و ندين.
- مايكونش من محبي الاستقرار.
- ألا يستخدم مصطلحات "محدودي الدخل"، "المرحلة المقبلة"، "لا مساس"، وغيرها من العبارات والجمل التي كان تردد كل أول مايو!
- يستنى بالساعات لما مواكب السادة المواطنيين تعدى ولو وصل قصر الرئاسة متاخر ياخد جزا
- مايكونش ساكن فى مصر الجديدة و كل يوم يقفلوا صلاح سالم عشانه هو ومراته وعياله
- يكون نصه عامل او فلاح عشان يعبر عن ارادة الشعب
- ميكنش عنده رئيس وزرا بيلبس بلوفر
- أول ما نقوله طير انت .. يطير فى ثوانى مش لازم بقى نعمله زار فى التحرير علشان نصرفه
- مفيش حاجه إسمها علاج بره مصر, ييجى يتعالج فى التأمين الصحى اللى الشعب بيتعالج فيه
- يحظر عليه تسمية شارع أو حمام عمومي أو إنشالله محطة تكاتك على اسمه
- يكون بيمشى بعريبته عال الدائرى ويشوف الميكروباصات والنقل بيعملوا فينا ايه :-)
- يقول لنا هيطلع يخطب الساعة كام بالضبط عشان ميذنبناش عشر ساعات على ما يتكرم ويطل علينا
- لو اتحرق فى عهده قطر وغرقت عباره .. يتم اعدامه مربوطا فى كرسى فى كابينة قطر مولعه جوه عباره بتغرق .. والبث مباشر
- وامين الشرطة كل ما يشوفه يقوله بطاقتك يالا وكل ما تحصل حادثة ياخدوه يحققوا معاه ويلطشوه بالقلم ويقولوا له رد عدل ياض
- يستحسن يكون فاقد الذاكرة، عشان مش كل خطاب يطلع يحكي قصة حياته
- يحبنا حب من طرف واحد و يقعد يبعتلنا جوابات و ورد و احنا منعبروش
- و مايقولناش ايها الاخوة المواطنون احنا مالناش اخ مستواه تدنى لدرجة رئيس
- يكون عمره.. عمره.. عمره ما ساق طيارة ولا ركبها ولا حتى طير طيارة ورق وهو عيل وما يكونش قتل واتقتل
- اسمه ما يتكتبش على اي حاجة، خالص، ولا حتى يتكتب في الجرايد، ولا اخباره تتنشر في الصفحة الاولى، ينشروا اخباره جنب السودوكو
- لازم يزور مصانع شبرا الخيمة و يقعد جمب الفلاتر بتاعت الدخان الخربانة و يشم العادم لمدة 10 ساعات اسبوعيا علي الاقل
- ميعرفش شرم الشيخ دي بيروحولها منين
- يكون مبيعرفش يتكلم عشان يبقي سهل نوقعة فالكلام ونعرف هو هيهرب فلوسة فين
- يلغى ميدان مصطفى محمود وما ينزلش المهندسين طول فترة ولايته
وياريت كمان ما يكونش اسمه مبارك اوسيد مشعل أو طنطاوى
ReplyDeleteويكون بيكره كلمة عز كره العمى وياريت يكون مش متجوز عشان لاتبقى عنده سيده مصر الولى ولا الخيره عشان ما نغنيش دنيا يا دنيا ما كفايه اللى جرى حاكم وملو هدومه والشعب حكماه مره ورئسنا فى الأخر يطلع راجل مسخره
ايه الحلاوه دي يا هندسه
ReplyDeleteاهم حاجه ميكونش من المنوفيه الغربيه
لان المنوفيه الشرقيه فيها ناس كويسه
:D :D :D
ReplyDelete